Enrique Iglesias njoftoi se albumi i tij i ardhshëm do të jetë ndoshta i fundit i karrierës së tij.

Këngëtari i njohur më herët ka thënë se planifikon të ndalojë regjistrimin e muzikës kur të arrijë albumin e tij të 11-të.

Vetë artisti kishte paralajmëruar se do të kishte një album final që pritet të publikohet gjatë muajit shkurt.

“Kam shumë vite që punoj për këtë album. Dhe siç kam thënë ky do të jetë albumi im i fundit. Nuk mendoj e di, nuk do të bëj më albume”, është shprehur 48-vjeçari për emisionin televiziv Today.

Fansat e këngëtarit të hit-it Bailando do të kenë një mundësi të mirë për të parë artistin të performojë gjatë turneut të tij. Edhe fansat shqiptarë të artistit mundën të shijonin një superperformancë gjatë koncertit të mbajtur në Tiranë në qershor të këtij viti.

Që nga mesi i tetorit, Iglesias ka performuar me artistë të tjerë si Ricky Martin dhe Pitbull. Të tre këngëtarët kanë ndarë skenën edhe në të kaluarën. Iglesias dhe Pitbull më parë realizuan një turne në 2017, ndërsa Iglesias dhe Martin në 2021.