Ed Sheeran ka vendosur të shesë rrobat e tij të vjetra për të mbledhur para për bamirësi.

Një total prej 445 artikujsh i janë dhënë dyqanit East Anglia’s Children’s Hospices (EACH) në Framlingham, Suffolk, ku këngëtari u rrit. Shumë prej artikujve do të shiten në ankand në faqen e bamirësisë eBay, e cila u hap herët për shkak të interesit publik.

Kevin Clements, drejtor i EACH i mbledhjes së fondeve dhe komunikimit, tha: “Është një gjest i jashtëzakonshëm. Rrobat nuk do të lahen ose hekurosen, ato do të shiten siç janë marrë”, thuhet në një deklaratë nga bamirësia, e cila gjithashtu konfirmoi se rreth gjysma e të brendshmeve ishin veshur nga Sheeran. Çdo artikull i shitur do të shoqërohet gjithashtu me një letër të autenticitetit të nënshkruar.

“Ai ka fansa në të gjithë botën dhe këto donacione padyshim që do të bëjnë bujë. Do të jetë emocionuese dhe magjepsëse të shohësh se si shkojnë gjërat”, u shpreh zoti Clements.

Ankandi fillestar ishte caktuar të niste më 16 nëntor, por për shkak të interesit “të jashtëzakonshëm” publik, EACH mori vendimin për ta çuar ankandin përpara, me 20 artikuj të lëshuar në mesditë dhe 40 të tjerë të lëshuar në orën 20:00 GMT.

Organizata bamirëse kujdeset për fëmijët me kushte kërcënuese për jetën dhe mbështet familjet e tyre në Suffolk, Norfolk, Cambridgeshire dhe Essex.