Jeta e këngëtarit të njohur spanjoll, Julio Iglesias, po shfaqet në ekranin e vogël përmes një seriali të përgatitur nga Netflix, me miratimin dhe drejtimin e tij.

Për herë të parë, ylli do të ndajë detaje si për jetën e tij ashtu edhe për karrierën e tij të jashtëzakonshme muzikore.

Seriali, i cili është aktualisht në zhvillim, do të tregojë historinë se si Iglesias u bë artisti i parë jo-anglisht-folës që depërtoi në tregjet amerikane dhe aziatike dhe përjetoi sukses masiv.

Gjatë karrierës së tij 55-vjeçare, artisti i lindur në Madrid ka interpretuar këngë në 12 gjuhë dhe më shumë se 60 milionë shikues i kanë shijuar performancat e tij.

“Për herë të parë vendosa të ndaj të vërtetën e jetës sime me një kompani globale si Netflix. Pas shumë mendimeve, një letër shumë prekëse nga zëvendëspresidentja e Netflix, Bela Bajaria ishte e mjaftueshme për të më bindur se Netflix ishte kompania ideale për të realizuar këtë projekt”, tha Julio Iglesias në një deklaratë.

Sipas Hola, këngëtari i njohur filloi një karrierë fillimisht si një futbollist premtues në Real Madrid para se një dëmtim i rëndë në 1963 t’i jepte fund karrierës së tij futbollistike.

Megjithatë, ndërsa ai ishte në spital, një kitarë që ia dha një infermiere në mënyrë që të rifitonte shkathtësinë në duart e tij ishte pikënisja që ai të bëhej një nga artistët më të shitur në botë.