Një koleksion i rrallë që i përket këngëtarit të ndjerë britanik Freddie Mercury ka dalë në ankand.

Janë rreth 30,000 objekte që i përkisnin yllit të muzikës, të cilat deri më tani janë ruajtur në rezidencën e tij në Kensington, falë përkushtimit të Mary Austin, një ndër miket më të ngushta e të besuara të liderit të grupit Queen.

Ndër sendet që do të jenë në këtë ankand janë piktura, tekste këngësh të shkruajtura me dorë, kostume dhe veshje skenike.

Vetë drejtori i ankandit shpjegon më shumë rreth këtij koleksioni të rallë.

“Ky koleksion nuk ka të bëjë vetëm me gjërat e bukura me të cilat Fredi pëlqente të rrethohej. Bëhet fjalë gjithashtu edhe për historinë e tij pra për momentet më kulminante në karrierën e tij profesionale si mjeshtri i madh i skenës. Ai ishte personi që krijoi disa nga tekstet më të paharrueshme për fundin e shekullit të 20-të.“

Ajo që ka më shumë peshë në këtë ankand është pianoja e cila planifikohet të shitet për 2-3 milionë Paund.

Me këtë piano ai kompozoi këngën hit të vitit 1975 “Bohemian Rhapsody”.

Pjesë e koleksionit është edhe kjo kurorë e modeluar si ajo Shën Eduardit, por edhe peliçja sintetike që Mercury veshi gjatë interpretimit të ‘God Save the Queen’, i fundit koncert live i grupit legjendar në vitin 1986.

Vokalisti i grupit të njohur rock ‘Queen’ ndërroi jetë në vitin 1991 në moshën 45-vjeçare, vetëm 24 orë pasi konfirmoi në një deklaratë se kishte SIDA dhe u bëri thirrje fansave të tij që t’i bashkohen luftës kundër kësaj sëmundjeje.

Koleksioni ekspozohet në Londër dhe do mbyllet në ditën që këngëtari i njohur do mbushte 77 vjeç, pra më 5 Shtator.