Ish-presidenti amerikan, Donald Trump, ka nxjerrë në treg linjën e tij të atleteve, një ditë pasi kompanitë e tij u gjobitën me 355 milionë dollarë për mashtrim.

Trump prezantoi “Trump Sneakers” në Filadelfia. Një palë atlete ngjyrë floriri me një detaj të flamurit amerikan në anën e pasme, shiten si Never Surrender High-Tops për 399 dollarë në një website të ri që shet gjithashtu parfumin e markës Trump “Victory47” për 99 dollarë shishja.

“Kjo është diçka për të cilën kam folur për 12 vjet, 13 vjet dhe mendoj se do të jetë një sukses i madh,” tha Trump.

“Unë thjesht dua t’ju them, kam dashur ta bëj këtë për një kohë të gjatë”, tha ai kur zbuloi linjën e atleteve.

Vetëm 1000 palë këpucë ari ishin në dispozicion, sipas faqes së internetit të atleteve, e cila i përshkruan atletet si “Super Limited”.

Të paktën 10 nga atletet prej ari u “autografuan rastësisht nga Trump”, sipas faqes së internetit.