Princesha Kate është rikthyer sërish në sy të publikut për të bërë një paraqitje elegante në Wimbledon.

Ndërsa vazhdon t’i nënshtrohet trajtimit për kancerin, Princesha e Uellsit guxoi të jetë e pranishme në finalet e meshkujve teke midis Carlos Alcaraz dhe Novac Gjokovic. Ajo mbërriti me vajzën e saj, Princeshën Charlotte, dhe motrën, Pippa Middleton.

Kjo është dalja e dytë publike e Princeshës së Uellsit, e cila pasi njoftoi sëmundjen e saj në mars 2024, mori pjesë në Trooping the Color dhe më pas u tërhoq sërish nga skena.

E qeshur dhe rrezatuese me një fustan të gjatë ngjyrë vjollce të ndezur, Kate spikati edhe një herë për elegancën e saj të lindur, e cila kombinuar me forcën e shfaqur kohët e fundit e bën atë një nga femrat më të dashura nga britanikët dhe më gjerë.

Daljet publike të Kate kanë qenë të pakta që nga fillimi i këtij viti pas operacionit të saj abdominal në janar dhe lajmit për diagnozën e saj me kancer në mars.