Gjergj Xhuvani iku qetësisht, fiks ditën që mbylli montazhin e filmit të ri

Pasi kishte mbaruar xhirimet e filmit “Liqeni im” në Shqipëri në fund të vitit të kaluar, Gjergj Xhuvani edhe pse vuante nga sëmundja e diabetit, në këtë vapë gushti s’e ndali punën. Regjisori i njohur ndërroi jetë në moshën 56 vjeçare, nga një sulm në zemër pasi kishin konsumuar darkën e përfundimit me sukses të motazhit të filmit të ri në Romë!
Filmi me skenar dhe regji të vetë Xhuvanit kishte marrë mbështetjen e Eurimages në Yerevan dhe kishte nisur xhirimet në dhejtorin e vitit të kaluar si një bashkëprodhim me Italinë dhe Maqedoninë, ndërkohë që kishte mbështetjen e Qendrës Kombëtare të Kinematografisë dhe Qendrës Kinematografike të Kosovës.
Regjisori i mirënjohur do të kujtohet si një nga artistët më të spikatur të kinematografisë dhe skenës shqiptare.
Disa nga titujt më të spikatur të filmave të tij janë “Lindje Perëndim lindje”, “I dashur armik”, “Parrullat”, “Bardhë e Zi”.
Mesa duket “Liqeni im” do të na japë mundësinë ta shijojmë edhe një herë, (edhe pse për të fundit) punën brilante të regjisorit Xhuvani.